ភ្នំពេញ៖ ឧបនាយករដ្ឋមន្ត្រី រដ្ឋមន្រ្តីក្រសួងយុត្តិធម៌ លោក កើត រិទ្ធ បញ្ជាក់ថា កម្ពុជានឹងមានវិជ្ជាជីវៈច្បាប់ថ្មីមួយដែលនឹងមានកើតឡើងនៅពេលអនាគតគឺ សន្ធានការី ដែលជាអ្នកសម្របសម្រួលអាជីពនៅក្នុងព្រះរាជាណាចក្រកម្ពុជា។

លោក កើត រិទ្ធ ថ្លែងដូចនេះ ក្នុងឱកាសបើកមហាសន្និបាតបូកសរុបលទ្ធផលការងារវិស័យយុត្តិធម៌ទូទាំងប្រទេស ឆ្នាំ២០២៣ និងលើកទិសដៅអាទិភាព ឆ្នាំ២០២៤ នាថ្ងៃទី២៧ ខែមីនា ឆ្នាំ២០២៤។

លោក កើត រិទ្ធ ថ្លែងថា៖«សន្ធានការីគឺជាអ្នកអាជីពក្នុងការសម្រុះសម្រួល ផ្សះផ្សាវិវាទជាអ្នក បញ្ចប់វិវាទ យើងអាចនិយាយថា ជាភ្នាក់ងារពន្លត់ភ្លើង នៅកម្ពុជា គឺពន្លត់ភ្លើងវិវាទនោះឯង ហើយសន្ធានការីនេះនឹងមានស្ថានភាពមិនខុសពីមេធាវីនោះទេ»។

លោកបានគូសបញ្ជាក់ថា ចៅក្រមដែលចូលនិវត្តក៏អាចក្លាយជាសន្ធានការីដែរ ដោយអាចដើរតួជាអ្នកផ្សះផ្សា ដោះស្រាយវិវាទបាន ដូចជាមេធាវីផងដែរ។ ហើយមេធាវីក៏អាចបំពាក់ នូវមុខនាទីជាសន្ធានការី ដែលមានន័យថាមិនមែនត្រឹមតែជាអ្នកដែលកាន់រឿងក្តី ប្តឹងទៅតុលាការនោះទេ ក៏ជាអ្នកដែរអាចរកការសម្របសម្រួលមួយចំពោះរឿងក្តីដែរ។

លោកបញ្ជាក់ថា មេធាវីទៅថ្ងៃអនាគតនឹងអាចផ្លាស់ប្តូរឥរិយាបថ ចេញពីអ្នកបង្កាត់ភ្លើងមកអ្នកពន្លត់ភ្លើងវិញ នេះជារឿងដែរសំខាន់សម្រាប់សង្គមជាតិ៕